«Եվ աղոթք անելիս շատախոս մի՛ եղեք, ինչպես հեթանոսները… Արդ, նրանց մի՛ նմանվեք, որովհետև ձեր Հայրը գիտի, թե ինչ բաներ պետք են ձեզ՝ Նրանից խնդրելուց առաջ» (ՄԱՏԹԵՈՍ 6.7,8):
Ամենամեծ ստերից մեկը, որ սատանան ասում է մարդկանց աղոթքի վերաբերյալ, այն է, որ աղոթքը պետք է երկար տևի: Նա կստիպի քեզ մտածել, որ պետք է ժամերով աղոթես, մինչև աղոթքդ լիարժեք համարվի, սակայն Աստծո Խոսքից և անձնական փորձառությունից գիտեմ, որ հարկ չկա, որ աղոթքը երկար տևի, որպեսզի այն զորավոր լինի: Աղոթքի զորավոր լինելը կախված չէ նաև նրա կարճ լինելուց: Մեր աղոթքների տևողությունը որևէ նշանակություն չունի Աստծո համար: Կարևորն այն է, որ մեր աղոթքները լինեն Հոգուց առաջնորդված, անկեղծ և հավատքով լեցուն:
Կարծում եմ, որ մենք կարող ենք այնքան խճճվել մեր աղոթքի բառերի մեջ, որ կորցնենք աղոթքի զորությունը: Ես կրկին ուզում եմ շեշտել, որ ոչ մի սխալ բան չկա երկար աղոթելու մեջ: Ինչպես ավելի վաղ ասացի, ես հավատում եմ, որ մենք պետք է ժամանակ հատկացնենք Աստծո հետ երկարատև հաղորդակցմանը և աղոթքին, և Աստծո հետ ժամանակ անցկացնելու մեր պատրաստակամությունը կամ դրա բացակայությունը որոշում է Նրա հետ մեր մտերմության աստիճանը: Սակայն, չեմ կարծում, որ առանց Սուրբ Հոգու առաջնորդության, մենք պետք է ջանանք որոշակի ժամեր տրամադրել Աստծո հետ խոսելուն և Նրան լսելուն՝ պարտականության զգացումից դրդված կամ որպես մարմնի աշխատանք: Եթե մեր կյանքի խնդիրներն իսկապես պահանջում են ավելի երկար աղոթել և տևական ժամանակ հատկացնել Աստծո ձայնը լսելուն, ուրեմն մենք պետք է ներդնենք այդ անհրաժեշտ ժամանակը, բայց հարկ չկա, որ երկարատև աղոթքներ անենք պարզապես ժամանակն արձանագրելու համար:
Աստծո Խոսքը Քեզ Համար Այսօր.թո՛ւյլ տուր, որ աղոթքդ լինի Հոգով առաջնորդված, սրտաբուխ և ճշմարիտ հավատքով լեցուն: