«Արդ եթե դուք, որ չար եք, գիտեք բարի պարգևներ տալ ձեր որդիներին, էլ որքա՞ն ավելի երկնավոր Հայրը Սուրբ Հոգին կտա նրանց, որ ուզում են Նրանից»: ՂՈՒԿԱՍ 11.13
Բոլորս կարիք ունենք մշտապես լցվելու Սուրբ Հոգով: Որպես հավատացյալներ Քրիստոսում՝ մենք ունենք Սուրբ Հոգուն, բայց թերևս ամբողջովին չենք հանձնվել Նրան՝ Նրա գործածության համար: Այդպիսին էր իմ վիճակը տարիներ շարունակ, մինչև որ հասա ճգնաժամային մի կետի, երբ այլևս չէի կամենում օրեցօր կաղալ՝ առանց որևէ իրական հաղթանակի:
Ես խնդրում էի, որ Աստված «ինչ-որ բան» աներ, և բաց էի Նրա ցանկացած ծրագրի համար: Ես նույնիսկ չգիտեի, թե ինչի կարիք ունեի, բայց Աստված գիտեր: Նա մշտապես հավատարիմ է հանդիպելու մեզ ճիշտ այնտեղ, որտեղ գտնվում ենք, և օգնելու, որ հասնենք այնտեղ, որտեղ պետք է լինենք:
Ես Աստծո Հոգով լցվելու կարիք ունեի, և Նրա շնորհքով ու ողորմությամբ իմ կարիքը բավարարվեց: Ես շարունակում եմ խնդրել Աստծուց մշտապես լցնել ինձ Իր ներկայությամբ և զորությամբ ու կարողություն տալ լինելու այն, ինչ Նա ցանկանում է, որ լինեմ: Մենք Սուրբ Հոգու զորության կարիքն ունենք, որպեսզի կատարենք Աստծո կամքը: Երբեք մի՛ հուսացեք ինքներդ ձեզ, առանց Նրա ոչինչ չեք կարող անել (տե՛ս Հովհ. 15.5):
Խնդրե՛ք Աստծո Հոգու լեցունությունն ամեն օր, և դուք հրաշալի մտերմություն կվայելեք Աստծո հետ: Երբ Սուրբ Հոգին իջնում է ձեզ վրա, այդ ժամանակ եք ստանում զորություն՝ լինելու Նրա վկան: Դուք կփոխվեք զարմանալի ձևով, երբ վստահեք Աստծո զորությանը, որը կլցնի ձեզ կարողությամբ և ուժով: