«Գոյություն ունեն շնորհների (պարգևներ, արտասովոր կարողություններ, որով առանձնանում են որոշակի քրիստոնյաներ՝ պայմանավորված աստվածային շնորհքի այն զորությամբ, որ գործում է նրանց մեջ Սուրբ Հոգով) առանձնահատուկ բազմազանություն և տեղաբաշխում, և դրանք տարբերվում են, բայց [Սուրբ] Հոգին նույնն է» (Ա ԿՈՐՆԹԱՑԻՆԵՐԻ 12.4):
Դժվար է բացատրել Հոգու պարգևները, որովհետև դրանք գործում են հոգևոր տիրույթում: Հուսով եմ, վերջին մի քանի ուղերձներում կարողացա նկարագրել այդ պարգևները և ցույց տալ, թե ինչպես են դրանք հիմնականում գործում: Հոգևոր պարգևների մասին կարելի է շատ խոսել, և ես քաջալերում եմ, որ կարդաս լավ գրքեր, որոնք նվիրված են Սուրբ Հոգու պարգևների թեմային:
Երբ գործում ենք գերբնական տիրույթում, պետք է զգույշ լինենք, բայց չվախենանք: Սատանան առաջարկում է Աստծո ճշմարիտ պարգևների բազմաթիվ աղավաղումներ, բայց մենք կարող ենք մնալ ճիշտ ուղու վրա աղոթքի և Աստծո Խոսքի ճշմարտությունը փնտրելու միջոցով:
Նաև հորդորում եմ, որ սկսես աղոթել Հոգու պարգևների համար: Խնդրի՛ր, որ Աստված գործածի քեզ այդ պարգևների մեջ, երբ հարմար գտնի: Մի՛ փնտրիր այն պարգևները, որոնք ամենից գրավիչ կամ հետաքրքիր են թվում, այլ փնտրի՛ր այն պարգևները, որոնք Աստված նախատեսել է քեզ համար:
Հոգու պարգևների դրսևորումն օգնում է մեզ կյանքում և անհավատներին ցուցադրում է մեր ներսում բնակվող Քրիստոսի զորությունն ու քաղցրությունը: Երբ Սուրբ Հոգու պարգևները գործում են մեր կյանքում, մեզ տրված Աստծո շնորհքի փառքը ցույց ենք տալիս նրանց, ովքեր հուսահատորեն կարիք ունեն հավատալու Հիսուսին:
Ձգտի՛ր գործել Հոգու պարգևներով՝ քո շինության և ուրիշների բարօրության համար: Երբ փնտրես պարգևները, մի՛ մոռացիր հատկապես քայլել սիրո մեջ, որովհետև սերը բոլոր պարգևներից մեծագույնն է:
ԱՍՏԾՈ ԽՈՍՔԸ ՔԵԶ ՀԱՄԱՐ ԱՅՍՕՐ. Սուրբ Հոգու պարգևները պիտի լինեն քո կյանքի բնականոն մասը: