Dhe do t’jua bëjnë këto gjëra, sepse nuk e kanë njohur as Atin, as mua. (GJONI 16:3)
Kam qenë shumë e trishtuar dhe kam patur shumë vështirësi në jetën time, por për vite me radhë kam fajësuar njerëzit e tjerë dhe rrethanat e mia. E kisha të vështirë të zhvilloja dhe të mbaja marrëdhënie të mira dhe isha e bindur se të gjithë njerëzit në jetën time duhej të ndryshonin në mënyrë që të mund të shkonim mirë. Me të vërtetë nuk më ka shkuar në mendje se mund të isha unë ajo që i shkaktonte problemet.
Një ditë në vitin 1976, ndërsa u luta që burri im të ndryshonte, Fryma e Shenjtë filloi të më fliste në zemrën time. U trondita ndërsa Ai më zbuloi butësisht mashtrimin në të cilin e kisha çuar veten duke besuar se të gjithë përveç meje ishin problemi. Për tre ditë, Fryma e Shenjtë më zbuloi se isha person i vështirë për t’u mirëkuptuar, e pamundur të isha e lumtur, kritike, egoiste, dominuese, kontrolluese dhe ky ishte vetëm fillimi i listës.
Përballja me këtë të vërtetë ishte jashtëzakonisht e vështirë për mua, por ndërsa Fryma e Shenjtë më dha hirin, fillova një udhëtim plotësisht shërues dhe lirie në jetën time. Shumë nga të vërtetat që mësoj sot dolën nga ajo kohë. Satani është mashtruesi i madh dhe babai i gënjeshtrës; nëse ai mund të na mbajë në errësirë, atëherë ai mund të na mbajë në robëri dhe mjerim. Edhe pse përballja me të vërtetën mund të jetë e dhimbshme, ajo është jetike e nevojshme për përparim dhe liri.
Siç tha Jezusi në vargun për sot, Fryma e Shenjtë është Fryma e së Vërtetës dhe Ai do të na flasë dhe do të na udhëheqë në gjithë të vërtetën.
FJALA E PERËNDISË PËR SOT: Kërkoji Frymës së Shenjtë të të zbulojë çdo zonë mashtrimi në jetën tënde.