Kërkoni Zotin dhe forcën e tij; kërkoni vazhdimisht fytyrën e tij. (PSALMI 105:4)
Kur mbreti Jozafat dëgjoi se një ushtri e madhe po grumbullohej për të sulmuar Judën, ai e dinte se çfarë të bënte. Ai kishte nevojë ta vinte veten të kërkonte jo këshillat e njerëzve, por të kërkonte Perëndinë dhe të dëgjonte drejtpërdrejt prej Tij.
Pa dyshim, Jozafati kishte qenë i përfshirë në beteja të tjera para kësaj, kështu që pse nuk mund të përdorte të njëjtat metoda që kishte përdorur në situatat e mëparshme? Pavarësisht se sa herë ka funksionuar diçka në të kaluarën, mund të mos funksionojë për të zgjidhur një krizë aktuale nëse Perëndia nuk e vajos përsëri. Ai mund të vajosë një metodë të vjetër dhe të zgjedhë të veprojë përmes saj, por Ai gjithashtu mund të na japë një drejtim krejt të ri, udhëzime që nuk i kemi dëgjuar kurrë më parë. Ne gjithmonë duhet të shikojmë te Perëndia, jo te metodat, formulat ose mënyrat që kanë funksionuar në të kaluarën. Fokusi ynë, burimi ynë i forcës dhe furnizimit, duhet të jetë Perëndia dhe vetëm Perëndia.
Jozafati e dinte që derisa të dëgjonte nga Perëndia, ai nuk do t’ia dilte mbanë. Bibla e Amplifikuar e quan nevojën e tij për të dëgjuar zërin e Perëndisë “nevojë jetike”. Ishte diçka pa të cilën ai nuk bënte dot asgjë; ishte jetike. Ishte thelbësore për jetën e tij dhe mbijetesa e popullit të tij.
Ju mund të jeni në një situatë të ngjashme me atë të Jozafatit. Ju, gjithashtu, mund të keni nevojë për një fjalë të freskët nga Perëndia. Ju mund të ndiheni si një burrë apo grua që po mbytet, jeni duke u fundosur. Ju mund të jeni të dëshpëruar për një fjalë personale nga Perëndia në mënyrë që të mbijetoni.
Perëndia dëshiron t’iu flasë shumë më tepër se sa dëshironi ju të dëgjoni prej Tij. Kërkojeni Atë duke i dhënë Atij kohën dhe vëmendjen tuaj, dhe ju nuk do të zhgënjeheni.
FJALA E PËRËNDISË PËR SOT: Ji i hapur të dëgjosh një fjalë të freskët nga Perëndia sot.