Кыйынчылыктын ортосундагы үмүт

Балким, силердин жашооңордо трагедия болгондур, силер капаланып, өзүңөрдү кантип кайра колго алып, алдыга умтулууну билбей жаткандырсыңар. Же ден соолугуңар начар болуп, дарыгердин кароосунан өтүүгө мүмкүнчүлүк жок болуп жаткандыр. Мен жакшы билем, дүйнөдө эптеп-септеп күн көрүп жүргөн, эртеңки күнү тамак-ашка жетээрине ишене бербеген адамдар көп.

Олуттуу кыйынчылыктарга туш болгондо, биз көп учурда көңүлүбүздү чөгөрүп, багынууну каалайбыз. Бирок, мындай кырдаалда биз кыла ала турган эң жакшы нерсе – бул Кудайга таянуу жана үмүтүбүздү үзбөө. Үмүт деген бул эмне? Үмүт – бул ар кандай учурда биз менен жакшы нерсе болушу мүмкүн деп ишенимдүүлүк менен күтүү. Бул биздин ишенимибизге жана буга карата мамилебизге тыгыз байланыштуу. Качан биз үмүткө, толуп турсак, жашообуз кубанычка, тынчтыкка толот.

Душман бизди тынымсыз үмүтсүздүк сезим менен басууга, баары жоголгонуна жана жашообузда мындан ары эч кандай жакшы нерсе болбой турганына ынандырууга умтулат. Бирок, Кудай биздин Ага таянып жана Анын батасын күтүп, үмүт менен жашашыбызды каалайт. Ыйык Китепте Анын ырайымдуулукка толгон жана бизге баарын таза барактан баштоого мүмкүндүк берген «үмүттүн Кудайы» экени айтылат (Римдиктерге 15:13тү карагыла).