Vir baie jare het ek ‘n swaar las van woede en onvergewensgesindheid rondgedra as gevolg van die mishandeling wat ek as ‘n kind gely het. In plaas daarvan om oor my gevoelens te kom, het ek gekies om opgesluit te bly in ‘n tronk met my eie negatiewe emosies, en in ‘n geestelike selfbejammerende houding geleef.
Een van die grootste geskenke wat ons egter vir onsself kan gee, is die bereidwilligheid om te vergewe. Trouens, om vinnig en mildelik te leer om te vergewe is die hoeksteen vir alle emosionele gesondheid en ‘n kragtige sleutel om ons emosies te beheer.
Wat Vergifnis vir Jou Beteken
Vergifnis bederf die vyand se plan om jou verhoudings te vernietig. Dit ontwapen die angel van bitterheid, nooi die vrede van God uit en bring genesende krag na jou siel.
Ek kan een ding vir jou vir seker sê: as jy wag totdat jy lus is om iemand te vergewe, sal jy nooit vergewe nie! Ons besluit om te doen wat God se Woord sê gaan verder as ons gevoelens. Daar is tye wanneer ons eenvoudig sal moet doen wat reg is, want dit is die regte ding om te doen. Om God se Woord te gehoorsaam, bring egter altyd ‘n beloning.
Twee Baie Belangrike Vrae
Vra jouself af: hoe reageer ek wanneer iemand my gevoelens seermaak? Laat ek toe dat my emosies op hol gaan en dit my vreugde steel?
Dit is maklik om toe te laat dat ons gevoelens ons beheer – dit neem nie die krag van die Heilige Gees om alles te doen en te sê wat ons wil doen en sê nie. Wanneer ons egter met God saamwerk om te doen wat Sy Woord sê, selfs wanneer ons emosies dit uitskree, bring ons seëninge in ons lewens en in die lewens van diegene rondom ons.
Wat Om te Doen As Iemand Jou Seermaak
Jesus sê in Lukas 6:27-28 … Maar as julle gewillig is om te luister, sê Ek julle moet julle vyande liefhê. Doen goed aan dié wat julle haat. Seën dié wat julle vervloek. Bid vir hulle wat julle seermaak (NLV).
Ek kan nou vir jou sê dat jy heel waarskynlik nie lus sal wees om dit te doen nie! God sal jou gehoorsaamheid eer as jy dit doen.
Laat Ek jou Aanmoedig om te Bid
‘’Here, U weet hoe ek nou voel en ek is eerlikwaar nie seker of ek wil hê hulle moet gelukkig wees nie. Ek weet wat U Woord sê om te doen, so ek neem ‘n stap van geloof en doen dit uit gehoorsaamheid. Vader, ek vra U om hulle lewe en alles wat hulle doen te seën. Werk asseblief in hulle hart – verander hulle en bring hulle nader aan U.’’
Weereens, wanneer ons kies om iemand te vergewe en vir hulle te bid, help dit ons net soveel of meer as wat dit hulle help. Dit is moeilik om kwaad te bly vir iemand as jy aktief vir hulle bid. Ook, ons gevoelens volg ons besluite. As ons ‘n kwaliteit keuse maak om goed vir iemand te wees, is dit net ‘n kwessie van tyd voordat ons gevoelens sal volg.
Ja, Jy Kan dit Doen!
Wanneer ek ook al oor vergifnis onderrig, kan ek my amper indink wat deur mense se gedagtes gaan. Joyce, vra jy my om te vergewe? Jy het geen idee waardeur ek is nie.
Glo my, ek verstaan. Jou seer, jou pyn en jou begeerte om te sien hoe ander betaal vir wat hulle gedoen het, laat vergifnis na ‘n moeilike keuse lyk. Hier is egter die waarheid: dis moeiliker om nie te vergewe nie. Ek sê dikwels om kwaad te bly is soos om gif te drink en te hoop dat jou vyand sal sterf. Die persoon wat jy regtig seermaak, is jouself!
Vertrou God om Jou Geregtigheid te Gee
Ek sê nie jy moet toelaat dat mense jou misbruik nie. Maar die Bybel sê ons moet God toelaat om ons verdediger te wees. Vergifnis is bloot ‘n keuse wat jy maak om God te vertrou om die regter te wees, nie jy nie. Wanneer jy God beheer oor die situasie gee, maak dit die deur oop vir die liefde, krag, guns en vrede van God om in jou lewe te volg.
1 Petrus 3:9 (NLV) sê, ‘’ Moenie kwaad met kwaad vergeld nie. Moenie iemand wat julle beledig, terugbeledig nie. Inteendeel, jou antwoord moet ’n seënwens wees. Dít is waartoe God julle geroep het en waarvoor Hy julle sal seën.’’
Leer om Jou Vyande Lief te Hê
God het ons Sy genade gegee om goed te wees vir mense – selfs vir mense wat nie goed vir ons is nie. Hy het ons die krag gegee om vir ons vyande te bid en nie kwaad te wees vir mense wat ons seergemaak of aangeval het nie (Sien Matteus 5:44).
Jesus sê in Lukas 6:35, ‘’ Nee, julle moet ook julle vyande liefhê! Doen goed aan hulle! Leen aan hulle! En moenie bekommerd wees dat hulle julle dalk nie kan terugbetaal nie. Dan sal julle beloning in die hemel baie groot wees, en julle sal werklik optree as kinders van die Allerhoogste, want Hy is goed vir die ondankbares en die slegtes’’ (NLV).
Werklike Antwoorde oor Vergifnis
Laat ons prakties raak oor hoe om dit te doen. As jy ‘n medewerker het wat die bevordering kry waarvoor jy God geglo het, die oomblik wat jy jaloesie en afguns begin voel, is die beste ding wat jy kan doen om gelukkig te wees vir hulle en uit jou pad te gaan om hulle te seën.
Wanneer ons dit doen, breek dit die mag van die vyand oor die situasie. Satan wil hê ons moet kwaad, beledig en bitter word. Hy wil ‘n wig indryf tussen ons en ander. Sy uiteindelike plan is dat ‘n wortel van bitterheid binne-in ons moet groei, want Hy weet dit sal ons vergiftig. Romeine 12:21 vertel ons deur goed te doen moet julle die slegte te bowe kom. Soos ons dit doen demp dit woede, twis, bitterheid en negatiewe emosies.
Ja, daar is tye wat opgetree moet word of iemand gekonfronteer moet word oor wat hulle gedoen het. Selfs dan wil God nie hê dat ons gebuk gaan onder bitterheid en onvergewensgesindheid nie.
Soek die ‘’Hoekom’’ Agter die ‘’Wat’’
Die waarheid is dat so baie mense nie regtig weet wat hulle doen nie – hulle reageer net uit hul eie seer en pyn. Om dit te onthou, sal ons help om te vergewe en weg te beweeg van vorige woede en onvergewensgesindheid.
Ek glo regtig nie my pa het verstaan wat hy emosioneel aan my doen of hoe hy ‘n goeie deel van my lewe sou beïnvloed nie. Hy het gedoen wat baie mense doen wat nie wedergebore is nie – selfsugtig te leef en hul eie begeertes te bevredig met geen agting vir die gevolge van hul dade nie.
Onthou wat Jesus gesê het toe Hy aan die kruis gehang het:
… Vader, vergewe hulle, want hulle besef nie wat hulle doen nie … (Lukas 23:34 NLV).
Sien Dinge Deur ‘n Ander Lens
Dit is maklik om te oordeel, maar die Bybel sê vir ons dat genade triomfeer oor oordeal (sien Jakobus 2:13). Ek bedoel nie dat misbruikers nie aanspreeklik is vir hul sondes nie,- ons moet almal verantwoordelikheid neem vir ons eie verkeerde optrede.
Die Here het my egter gewys dat genade die ”waarom” agter die ”wat” sien. Genade en deernis kyk nie net na die verkeerde optrede nie, dit kyk verder as die persoon wat die verkeerde doen – na die kinderjare, die temperament, die hele lewe van die individu. God haat sonde, maar Hy het die sondaar lief.
Kies Vryheid en Vergewe
Ek ken dalk nie jou storie of die pyn waardeur jy is nie, maar ek weet die enigste manier om alles te ervaar wat God vir jou het, is om te vergewe.
Ek weet dit sal nie maklik wees nie. Dit verg geloof en moed om te vergewe en ‘n nuwe begin in jou lewe en verhoudings te maak. As jy God vra, sal Hy mildelik Sy genade en alles wat jy nodig het om Hom te gehoorsaam verskaf en jou na ‘n plek van emosionele vryheid lei.
Dit is ‘n wonderlike plek om te wees as ons met deernis na mense kan kyk wat ons seergemaak het en bid wat Jesus gebid het: ”Vader, vergewe hulle, want hulle weet nie wat hulle doen nie.”