Daarom, soos julle reeds doen, moet julle aanhou om mekaar moed in te praat en geestelik op te bou. – 1 Tessalonisense 5:11
Woorde van aanmoediging maak mense sterker en rus hulle toe om alles te wees wat hulle in die lewe kan wees. Dit help mense om nie hul drome te laat vaar nie, maar om voort te beur totdat hulle oorwinning behaal.
Baie van die wêreld se grootste uitvindings is te danke aan mense wat ander se ontmoedigende woorde weerstaan het. Hulle het gelukkig aangehou, maar hoeveel ander groot dinge het ons dalk misgeloop omdat mense moedeloos geraak het?
Enigeen kan besluit om ander mense te bemoedig. Al wat jy hoef te doen, is om God te vra om jou te gebruik. Begin dan na mense kyk soos God na hulle kyk. Hy sien eerste die goeie in mense raak, en jy kan jouself leer om dieselfde te doen. Wees op die uitkyk na die positiewe dinge en fokus daarop! Vra God om bemoedigende dinge in jou hart te plaas sodat jy bemoedigend met ander kan praat.
Kraggedagte
Ek kies om te bemoedig en weier om te ontmoedig.