اپنی راہ خُداوند پر چھوڑ دے (اُس پر اپنے ہر ایک بوجھ کی فکر ڈال دیں) اور اُس پر توکُّل کر(تکیہ کریں، بھروسہ کریں اور پُراعتماد ہوں)۔ وُہی سب کُچھ کرے گا۔ زبُور37 : 5
خُدا ہمیں ثابت قدمی کے نئے مقام پر لے جانا چاہتا ہے۔ یہ پُرجوش اور شُکرگزار ہونے کی بات ہے کیونکہ ثابت قدمی کے ساتھ برکت آتی ہے۔ ثابت قدم رہنا ہمیشہ آسان نہیں ہوتا لیکن اِس کا اَجر بڑا ہے۔ ہم سب ایک جنگ میں ہیں لیکن ہمیں اس آزمائش کا سامنا کرنا پڑتا ہے کہ اس جنگ سے دست بردار ہوجائیں اور ہمت ہار دیں لیکن ثابت قدمی وہ چیز ہے جو ہمیں اس آزمائش کا مقابلہ کرنے میں مدد گارثابت ہوسکتی ہے۔
جب آپ اپنی زندگی کے لیے خُدا کے مقصد کوپورا کرنے کےلئے تندہی سے ثابت قدمی کا مظاہرہ کرتے ہیں تو آپ ان سب چیزوں کو حاصل کریں گے جو اس نے آپ کے لئے رکھی ہیں۔ خُدا آپ سے مُحبّت کرتا ہے اور چاہتا ہے کہ آپ اُس کے ساتھ ثابت قدمی سے لپٹے رہیں – پوری زندگی کے لیے۔ میں تصور نہیں کرسکتی کہ اس سے زیادہ تسلّی بخش، فائدہ مند اور بے خطر کوئی چیز ہوسکتی ہے۔ اُس کے پاس آپ کے لیے اس سے کہیں زیادہ ہے جو آپ نےاُس سے مانگا یا تصور کیا ہو۔ لیکن اُس کے منصوبوں کو اپنی زندگی میں پورا ہوتا ہوا دیکھنے کے لیے آپ کو اُس کے اور اُس کی مرضی کے لیے 100 فیصد ثابت قدم رہنا ہوگا۔
شُکرگزاری کی دُعا
اَے باپ میں اپنی زندگی مکمل طور پر تیرے حوالے کرنے کا انتخاب کرتا/کرتی ہوں۔ میں شُکر گزار ہوں کہ تُو میری اس مقصد کی جانب راہنمائی کر رہا ہے جو تیرے پاس میرے لیے ہے۔ تیری مدد سے، میں تجھ پر توجہ مرکوز کروں گا/گی اور اپنی زندگی کے ہر حصے کو تیرے منصوبے اور مقصد کے لیے وقف کروں گا/گی۔