کیونکہ میں خُداوند تیرا خُدا تیرا دہنا ہاتھ پکڑ کر کہوں گا مت ڈر۔ میں تیری مدد کروں گا! (یسعیاہ ۴۱ : ۱۳)
جب ہم پاک روح کی راہنمائی میں چلنا چاہتے ہیں تو ہمیں رکاوٹوں کا سامنا کرنا پڑتا ہےاور بہت دفعہ یہ رکاوٹ خوف کی صورت میں ہمارے سامنے آتی ہے ۔۔۔۔۔۔ کسی بڑے خوف کی صورت میں نہیں، جیسے کہ کسی قدرتی آفت یا خوفناک بیماری یا کسی اور تباہی کی صورت میں ۔۔۔۔۔۔ بلکہ عام ، معمولی باتوں میں بےچینی اور بڑبڑاہٹ کےاحساس کی صورت میں۔ یہاں تک کہ ابلیس دلیری سے دُعا کرنے کی راہ میں خوف کو رکاوٹ کے طور پراستعمال کرتا ہے۔ وہ چاہتا ہے کہ ہم اِیمان سے نہیں بلکہ خوف سے خُدا کے پاس آئیں۔
کچھ لوگ ہر روز مسلسل چھوٹی چھوٹی باتوں کے ڈرمیں بہتے رہتے ہیں اور اس طرح کی باتیں کرتے ہیں، ’’ مجھے ڈر ہے کہ اتنی ٹریفک کی وجہ سے مجھے دیرنہ ہوجائے۔‘‘ یا ’’مجھے ڈرہے میرا کھانا نہ جل جائے۔‘‘ یا ’’مجھے ڈر ہے کہ ہفتہ والے دن کھیل کے دوارن سارا دن بارش نہ ہوتی رہے۔‘‘ اگرچہ یہ روزمرہ کے خوف بہت ہی معمولی ہیں لیکن یہ خوف ہیں اور یہ ہماری توجہ فکروں پر لگائے رکھتے ہیں اور ہم خُدا کی آواز سُننےسے قاصر رہتے ہیں ۔ دشمن کواجازت نہیں دینی چاہیے کہ وہ ہمیں ان معمولی باتوں میں پھنسائے اورہماری زندگیوں کو ایسی ادنیٰ، متواتر خوف کی باتوں سے متاثر کرے، چاہیے کہ ہم خُدا سے دُعا کریں اوراُس پر بھروسہ کریں۔
میرا مقولہ ہے ’’ہر چیز کے بارے میں دُعا کریں اورکسی چیز سے نہ ڈریں۔‘‘ خُدا سے باتیں کرنے اور اُس کی آوازسُننے کی عادت بنانے کے دوران ہمیں بڑی تندہی سے ایسے معمولی خوف، عادات اور خیالات کا مقابلہ کرنا ہے جو دُعا کوترقی اور فروغ پانے نہیں دیتے۔ پاک روح ایساکرنے میں ہماری مدد کرنا چاہتا ہے، پس ہمیں اس سے کہنا چاہیےکہ وہ ہماری راہنمائی کرے تاکہ ہم بُری عادات کو چھوڑ کرایسے مثبت رویوں کو اپنائیں جن کے وسیلہ سے ہم متواتر، تمام دن ایمان سے خدا سے رابطہ قائم کرسکیں۔ جب ہم اس طرح پاک روح کی راہنمائی میں چلیں گے تو ہماری دُعائیں اورخُدا کی آواز سنُنے کی صلاحیت سانس کی مانند آسان ہو جائے گی۔
آج آپ کے لئے خُدا کا کلام: ہر چیز کے بارے میں دُعا کریں؛ کسی چیز کا خوف نہ کریں۔