«Հիսուսն էլ նրանց մտիկ տալով ասաց. «Մարդկանց կողմից դա անկարելի է, բայց Աստծո կողմից ամեն բան կարելի է»»: ՄԱՏԹԵՈՍ 19.26
Շատ մարդիկ, որոնց հանդիպում եմ, իրենց քրիստոնեական կյանքում ցանկանում են սկսել Ա կետից, երկու անգամ թարթել աչքերը և հայտնվել Ֆ կետում: Շատերը հուսախաբված են, քանի որ չգիտեն, թե ինչ պարգևներ ունեն, կամ ինչ է Աստված կանչել իրենց անելու: Նրանցից ոմանք այնքան են վախենում ձախողվելուց և սխալվելուց, որ ոչ մի քայլ չեն անում:
Բոլորս ունենք չզարգացրած ներուժ, բայց երբեք չենք տեսնի դրա դրսևորումը, մինչև չհավատանք, որ կարող ենք անել այն, ինչ Աստված Իր Խոսքում ասում է, որ կարող ենք: Մինչև հավատքով քայլ չանենք ու չհավատանք, որ Աստծո հետ ամեն բան հնարավոր է, Նա չի կարողանա մեր ներսում իրականացնել այն աշխատանքը, որն անհրաժեշտ է մեր ներուժը զարգացնելու համար: Որպեսզի զարգացնենք այն, ինչ Նա դրել է մեր մեջ, մեզնից կպահանջվի համագործակցություն և պատրաստակամություն, հավատք, վճռականություն, հնազանդություն և քրտնաջան աշխատանք:
Ոչ ոք չի կարող վճռական լինել մեր փոխարեն, մենք պետք է վճռական լինենք ինքներս մեզ համար: Եթե վճռական չլինենք, սատանան կգողանա մեզնից այն, ինչ ունենք: Քաջալերում եմ, որ գործածեք ձեր ներուժը՝ ինչ-որ բան անելով: Դուք երբեք չեք հայտնաբերի, թե ինչի եք ընդունակ, եթե երբեք որևէ բան չփորձեք: Մի՛ վախեցեք քայլ անելուց և իրականացնելուց այն, ինչ հավատում եք, որ Աստված առաջնորդում է ձեզ անելու: Երբ քայլ անեք, կբացահայտեք, որ մեծ բաների եք ընդունակ: