In vandag se samelewing vier onsekerheid en selfverwerping hoogty. Meer as ooit tevore, hou soveel mense eenvoudig nie van hulself nie. Oor die jare het ek talle mense ontmoet wat glo dat God kwaad is vir hulle omdat hulle nog nie by die plek van volmaaktheid is nie. Gevolglik leef hulle in ‘n toestand van ewigdurende frustrasie – hulle verwerp hulself en voel sleg elke keer as hulle ‘n fout maak.
Jesus het nie Sy lewe gegee vir ons om heeltyd skuldig en veroordeeld te voel nie. Hy wil hê ons moet goed voel oor onsself en ons verhouding met Hom. Dit begin alles met die ontdekking van ons ware identiteit in Christus.
Is jy ‘n Gelowige of ‘n Presteerder?
Ek het vir baie jare probeer om God te behaag met my werke. Dit het gevoel asof ek op ‘n prestasie-trapmeul gelewe het – ek het altyd probeer om iets te doen om goed te voel oor myself en te voel of ek reg doen in Sy oë. In die proses het ek moeg, uitgeput en ongelukkig geword.Ek het net gedink iets werk nie.
Ek was reg. Maak nie saak hoe lief ons God het en kies om te doen wat reg is nie, ons sal altyd gefrustreerd wees totdat ons hierdie lewensveranderende waarheid verstaan:
‘’Dit is mos dié genade wat julle verlos het deurdat julle tot geloof gekom het. En julle verlossing kom nie uit julleself nie, maar is ’n gawe van God’’ (Efesiërs 2:8 NLV).
Daar is niks wat ons kan doen om ons verlossing of geregtigheidsstand by God te verdien nie; ons is geregverdig in Hom deur ons geloof in Jesus Christus. ‘n Gelowige wat nie hierdie begrip het nie, is soos ‘n jumbo-straler op die aanloopbaan sonder brandstof – hy het al die toerusting, maar gaan nêrens nie!
In Sy genade het God my toegelaat om te sien dat daar absoluut niks is wat ek kan doen vir Hom om my meer of minder lief te hê as wat Hy reeds het nie. Al wat Hy wou hê, was dat ek in Jesus moes glo, ‘’Glo in Hom wat die Vader gestuur het” (Johannes 6:29 NLV) en die geregtigheid wat Hy voorsien het, ontvang.
Sien Jouself deur God se Oë
Om ware vryheid te ervaar en te groei in ons verhouding met God, moet ons leer om onsself te aanvaar net waar ons is en onsself te sien soos God ons sien. Soos ons dit doen, sal ons begin verstaan dat om soos Christus te word ‘n proses is wat tyd neem … en God sal getrou wees om die goeie werke wat Hy in ons begin het, te voltooi (sien Filippense 1:6).
2 Kor 5:21 (NLV) sê, ‘’ God het Hom wat nie sonde geken het nie, sonde gemaak ter wille van ons sodat ons, op grond van ons hegte verhouding met Christus, deur God vrygespreek kan word.’’
Dit is die basis van selfaanvaarding – die wete dat God ons deur Jesus aanvaar en ons as totaal geregverdig sien. Dit beteken nie dat ons nie meer sondig of dat ons dit kan afmaak asof dit nie ‘n groot probleem is nie. Dit beteken eenvoudig dat God ons liefhet selfs terwyl ons in die proses is om soos Christus te word – voordat ons die doel bereik het.
Byvoorbeeld, toe sy twee jaar oud was, het een van ons kleindogters woedeaanvalle gehad wanneer sy nie haar sin gekry het nie. Sy het haarself op die grond neergegooi en onbeheersd geskree. Al het ek nie van haar gedrag gehou nie, was ek nog steeds geweldig lief vir haar. Ek hou nie op om my kleinkinders lief te hê of skop hulle uit die familie omdat hulle verkeerde dinge doen nie. Ek is lief vir hulle en werk saam met hulle om die goeie karakter te ontwikkel wat hulle nodig het om sukses in die lewe te behaal.
Dieselfde is waar met God, ons hemelse Vader. Hy is nie lief vir ons verkeerde gedrag nie, maar Hy is beslis lief vir ons. Romeine 5:8 sê dat Hy Sy liefde vir ons bewys het deur sy Seun te stuur ‘’ten spyte daarvan dat ons nog sondaars was.’’ Met ander woorde, Hy het nie gewag totdat ons geregverdig was om Jesus te stuur nie – Hy het Jesus gestuur omdat ons nooit sonder Hom geregverdig sou wees nie!
Trek jou Kleed Aan
Jesaja 61:10 (NLV) sê, ‘’Ek verheug my in die Here! Ek is bly in my God! Want Hy het vir my klere van redding aangetrek, en vir my die mantel van regverdigheid omgehang. Ek is soos ’n bruidegom met sy sierkroon, soos ’n bruid verfraai met haar juwele.’’
Wat beteken dit vir ons? Dit beteken dat wanneer ons foute maak, God ons letterlik bedek met sy kleed van geregtigheid. Wanneer die vyand dus teen ons kom met gedagtes van skuld of veroordeling, kan ons rotsvas staan teen sy beskuldigings. Ons kan op God se Woord staan en sê…
‘’Ek is die geregtigheid van God in Christus. Ek is geklee in Sy geregtigheid – nie myne nie. Die Bybel sê dat as ek my sonde bely, God getrou is om my te vergewe en my van alle ongeregtigheid te reinig. Ek is geliefd! ‘’ (sien 1 Johannes 1:9).
God is aan jou kant en Hy wil hê jy moet goed voel oor jouself en die vordering wat jy maak. Moet dus nie jou tyd gefrustreerd spandeer omdat jy nog nie jou doel bereik het nie. God is nie kwaad vir jou omdat jy nie perfek is nie – Hy is net teleurgesteld as jy ophou om die wedloop te hardloop!