Ambao Mungu alipenda kuwajulisha jinsi ulivyo utajiri wa utukufu wa siri hii katika mataifa, nao ni Kristo ndani yenu, tumaini la utukufu. WAKOLOSAI 1:27
Maombi mafupi rahisi yanaweza kuwa na nguvu kushinda maelezo, lakini hilo haliondoi ukweli kwamba maombi ni siri kubwa. Watchman Nee, Mkristo Mchina ambaye aliandika vitabu vyenye mambo mengi akiwa gerezani kwa sababu ya imani yake, anaandika, “Maombi ndiyo tendo la ajabu sana katika ulimwengu wa kiroho, ni kama tu mapenzi ya siri.”
Ninaamini siri kubwa kabisa ya maombi ni kwamba yanaunganisha mioyo ya watu ulimwenguni na moyo wa Mungu mbinguni. Maombi ni ya kiroho na huenda katika eneo lisiloonekana; yanaleta vitu kutoka hayo maeneo yasiyoonekana hadi kwenye maeneo tunayoyaona, katika ulimwengu unaotuzunguka, hadi mahali tunapoishi.
Tunaweza kushukuru Mungu kwamba maombi huleta baraka za kiroho katika maisha yetu ya kawaida ya kila siku na kuleta nguvu za kiroho kushinda hali zetu za kilimwengu. Sisi binadamu ndio viumbe pekee katika ulimwengu wetu unaojulikana ambao tunaweza kusimama katika ulimwengu wa kawaida na kugusa eneo la kiroho.
Sala ya Shukrani
Ninakushukuru, Baba, kwamba umeniaminisha na nguvu za maombi. Nisaidie kujua kwamba ninaposali, huwa situmii maneno ovyovyo—ninaunganisha mbingu na dunia. Asante, Bwana, kwa siri na nguvu ya maombi.