Por Jezusi, duke u përgjigjur, i tha: «Martë, Martë, ti po shqetësohesh dhe mundohesh për shumë gjëra; por një gjë është e nevojshme, dhe Maria zgjodhi pjesën e mirë [ që është në avantazhin e saj], që asaj nuk do t’i hiqet». ( LUKA 10:41-42)
Në tregimin që çon në vargun e sotëm, Jezusi shkoi për të vizituar dy motra, Marinë dhe Martën. Marta ishte e zënë duke përgatitur gjithçka për Të – duke pastruar shtëpinë, duke gatuar dhe duke u përpjekur të linte përshtypje duke i pasur gjithçka në rregull. Nga ana tjetër, Maria e shfrytëzoi rastin të shoqërohej me Jezusin. Marta u zemërua me motrën e saj, duke dashur që ajo të ngrihej dhe të ndihmonte në punë. Madje, ajo iu ankua Jezusit dhe i kërkoi t’i thoshte Marisë që të merrej me punë.
Përgjigja e Jezusit filloi me “Martë, Martë” dhe këto dy fjalë nënkuptojnë më shumë sesa mund të kuptojmë fillimisht. Ata na thonë se Marta ishte shumë e zënë për të pasur marrëdhënie, ajo po zgjidhte punën në vend të intimitetit dhe po keqpërdorte kohën e saj dhe po humbiste atë që ishte jetike.
Megjithatë, Maria vepronte me mençuri; ajo po përfitonte nga momenti. Ajo mund ta kalonte pjesën tjetër të jetës duke pastruar, por atë ditë, Jezusi kishte ardhur në shtëpinë e saj dhe ajo donte që Ai të ndihej i mirëpritur dhe i dashur. Ai kishte ardhur për ta parë atë dhe Martën, jo për të inspektuar shtëpinë e tyre të pastër. Ndërsa mendoj se një shtëpi e pastër është e rëndësishme, nuk ishte koha për t’u përqendruar në të. Ishte koha për t’u përqendruar te Jezusi sepse Ai ishte atje.
Unë e kujtoj veten time dhe ju inkurajoj të përdorni mençurinë dhe të mos humbisni praninë e Perëndisë kur ajo është e disponueshme. Ka raste kur ndiejmë se Fryma e Shenjtë na nxit të lutemi ose të kalojmë kohë në praninë e Tij, por ne preferojmë të punojmë ose të luajmë. Kur Ai na thërret, ne duhet të përgjigjemi menjëherë. Bekimet e pranisë së Tij peshojnë shumë më tepër se përfitimet e çdo gjëje tjetër që mund të bënim.
FJALA E PERËNDISË PËR SOT: Mos e humbit mundësinë për të shijuar prezencën e Perëndisë.