Dëgjo këtë, o Job, ndalu dhe merr parasysh mrekullitë e Perëndisë! (JOBI 37:14)
Kam dëgjuar shumë njerëz të thonë: “ Perëndia nuk më flet kurrë mua.” Por jam e bindur se ka më shumë të ngjarë që ata nuk e dëgjojnë kurrë Atë, nuk dinë si të dëgjojnë prej Tij, ose janë bërë të pandjeshëm ndaj zërit të Tij. Perëndia bën shumë përpjekje për të na folur përmes Fjalës së Tij, shenjave natyrore, zbulesës së mbinatyrshme dhe konfirmimit të brendshëm, gjithçka që kam shkruar në këto meditime.
Ndonjëherë ne mendojmë se nuk mund të dëgjojmë zërin e Perëndisë sepse ka disa pengesa të caktuara në zemrat tona ose në jetët tona që na pengojnë ta dëgjojmë Atë qartësisht. Një nga këto gjëra është thjesht të qenit shumë të zënë. Ne jemi kaq të zënë sa nuk kemi kohë të presim në Perëndinë ose të dëgjojmë zërin e Tij. Ne mund të bëhemi shumë të zënë edhe me aktivitete shpirtërore, të tilla si kisha apo shërbesat ndaj të tjerëve, sa që nuk kemi vend për kohën me Perëndinë në axhendën tonë. Më kujtohet një kohë kur po punoja kaq fort për Perëndinë saqë nuk kisha kohë për ta kaluar me Të. Kjo i ndodh shumë njerëzve.
Çfarë ne bëjmë për Perëndinë duhet të jetë gjithmonë dytësore në marrëdhënien tonë me Të. Koha është e jona për të bërë si të duam, kështu që ne duhet të zgjedhim atë që bëjmë me të me mençuri. Çdo person ka të njëjtën sasi kohe në ditë dhe pasi të përdoret, ne nuk mund ta kthejmë atë. Organizoni axhendën tuaj rreth Perëndisë në vend që të përpiqeni ta fusni Atë në axhendën tuaj.
FJALA E PERËNDISË PËR SOT: Përdoreni kohën tuaj me zgjuarsi sepse kur e shpenzoni atë, nuk mund ta riktheni më.