“Jua kam thënë këto gjëra, që të keni paqen në mua; në botë do të keni shtrëngime, por merrni zemër, unë e munda botën!” – Gjoni 16:33
Të kemi një sjellje të qetë dhe të paqtë, është e çmuar. Është një sjellje që thotë “Unë po i besoj Perëndisë” dhe i flet njerëzve fuqishëm. Që të jemi vazhdimisht në paqe, duhet kohë, përqendrim dhe hir nga Perëndia.
Shumë shpesh, niveli ynë i stresit lidhet me rrethanat tona. Mund të jemi në stres, sepse jemi gjithmonë të zënë, kemi vështirësi financiare, nuk po shkojmë mirë me dikë që e duam.
Për të mposhtur stresin në jetën tonë, kemi nevojë të mësojmë të praktikojmë paqen që na është siguruar nga fuqia e fitores së Jezusit. Një mënyrë për të zhvilluar paqen e qendrueshme është të mësosh si të jetosh “në të tashmen”. Mund të shpenzojmë shumë kohë duke menduar për të shkuarën apo duke vrarë mendjen si do të jetë e ardhmja… por nuk mund të arrijmë asgjë, nëse mendja jonë nuk është e përqendruar në të sotmen.
Bibla na thotë që Perëndia na jep hirin e Tij çdo ditë që ne të jetojmë. Unë besoj se hiri i Perëndisë është fuqia që na mundëson dhe na jep energji për të bërë gjërat që kemi nevojë. Perëndia jep nga hiri i Tij bujarisht, ashtu si e kemi nevojë. Çdo ditë kemi nevojë të themi: “Perëndia më ka dhënë të sotmen. Unë do të ngazëllej dhe gëzohem në të.”
Nëse mësojmë t’i besojmë Perëndisë “në të sotmen” duke marrë hirin e Tij sipas nevojës, mund të bëhemi një person i paqtë, dhe kjo është e fuqishme.
Lutje
Perëndi, unë e di që Ti ke mposhtur çdo pengesë, prandaj të kërkoj të më ndihmosh të jetoj në paqen që Ti ke siguruar për mua. Më trego të të besoj Ty ndërsa jetoj “në të sotmen”.